ଦୁଇ ଷଣ୍ଢଙ୍କ ଲଢେଇରେ ଦୁଇ ମହିଳା ଆହତ, ଏସସିବିରେ ଭର୍ତ୍ତି |
କଟକ ( ଉତ୍କଳ ନ୍ୟୁଜ ) ୨୦-୦୬-୨୦୨୬ : କଟକ ସହରର ଚାଉଳିଆଗଞ୍ଜ ଦୁର୍ଗା ଛକରୁ ରାଧାକୃଷ୍ଣ ମନ୍ଦିର ମଧ୍ୟବର୍ତ୍ତୀ ରାସ୍ତାରେ ଆଜି ଦୁଇଟି ଷଣ୍ଢଙ୍କ ମଧ୍ୟରେ ଲଢେଇ ହେଉଥିବା ବେଳେ ବାଟରେ ଯାଉଥିବା ଦୁଇଜଣ ମହିଳା ଆହତ ହୋଇଥିବା ଜଣାପଡ଼ିଛି। ଆହତ ଦୁଇ ମହିଳା ହେଲେ ମୀନାରାଣୀ ଲେଙ୍କା (୪୫) ଏବଂ ସଂଯୁକ୍ତା ବେହେରା (୪୮)। ସୂଚନା ଅନୁଯାୟୀ, ଦୁଇ ଷଣ୍ଢ ରାସ୍ତା ମଧ୍ୟରେ ଭୟଙ୍କର ଭାବେ ଲଢେଇ କରୁଥିବା ସମୟରେ ସେହି ରାସ୍ତା ଦେଇ ଯାଉଥିବା ଉଭୟ ମହିଳାଙ୍କୁ ଧକ୍କା ଲାଗିଥିଲା। ଫଳରେ ସେମାନେ ଗୁରୁତର ଭାବେ ଆହତ ହୋଇ ରାସ୍ତାରେ ପଡ଼ିଯାଇଥିଲେ। ସ୍ଥାନୀୟ ଲୋକମାନେ ତୁରନ୍ତ ଉଦ୍ଧାର କାର୍ଯ୍ୟ କରି ଆମ୍ବୁଲାନ୍ସ ଯୋଗେ ଉଭୟ ଆହତଙ୍କୁ କଟକ ଏସସିବି ମେଡିକାଲ କଲେଜ ଓ ହସ୍ପିଟାଲକୁ ପଠାଇଥିଲେ। ସେଠାରେ ସେମାନଙ୍କର ଚିକିତ୍ସା ଚାଲିଥିବା ଜଣାପଡ଼ିଛି। ଘଟଣା ପରେ ଅଞ୍ଚଳରେ କିଛି ସମୟ ପାଇଁ ଆତଙ୍କର ପରିବେଶ ସୃଷ୍ଟି ହୋଇଥିଲା। ସହରରେ ବୁଲା ଷଣ୍ଢଙ୍କ ଉତ୍ପାତ ଦିନକୁ ଦିନ ବଢ଼ୁଥିବାରୁ ଏହାର ସ୍ଥାୟୀ ସମାଧାନ ପାଇଁ ସ୍ଥାନୀୟ ବାସିନ୍ଦାମାନେ ପ୍ରଶାସନ ଓ କଟକ ମହାନଗର ନିଗମ (ସିଏମସି)ର ତୁରନ୍ତ ହସ୍ତକ୍ଷେପ ଦାବି କରିଛନ୍ତି।
